Երեխաների պաշտպանության միջազգային օրվա կապակցությամբ Ա. Ալիխանյանի անվան ազգային գիտական լաբորատորիան հյուրընկալել էր աշխատակիցների երեխաներին և թոռնիկներին։

 Օրվա ընթացքում փոքրիկները հնարավորություն ունեցան ծանոթանալու գիտական միջավայրին, շրջելու լաբորատորիայի տարածքում, տեսնելու գիտնականների աշխատանքը և բացահայտելու գիտության հետաքրքիր աշխարհը։ Նրանք մի քանի ժամով դարձան լաբորատորիայի ամենաերիտասարդ հետազոտողները՝ մասնակցելով լաբորատորիայի առօրյա աշխատանքին։

Օրը լի էր նաև ուրախ ժամանցով, խաղերով և հաճելի անակնկալներով, որոնք երեխաներին պարգևեցին վառ տպավորություններ, նոր գիտելիքներ և անմոռանալի հիշողություններ։

 Երեխաները մեր ապագան են, և նրանց հետաքրքրասիրության, ստեղծագործ մտածողության ու գիտելիքի հանդեպ ձգտման խրախուսումը մեզ համար առանձնահատուկ կարևորություն ունի։ Վստահ ենք, որ գիտության հանդեպ հետաքրքրությունը ձևավորվում է դեռ մանկուց, ուստի այս օրը նպատակ ուներ երեխաներին ծանոթացնել գիտական միջավայրին, խրախուսել նրանց հետաքրքրասիրությունն ու բացահայտումների հանդեպ ձգտումը։ Գիտության հանրայնացումն ու երիտասարդների շրջանում գիտական մտածողության խթանումը լաբորատորիայի ռազմավարական առաջնահերթություններից են, քանի որ ապագայի գիտական և տեխնոլոգիական առաջընթացի հիմքը ձևավորվում է հենց այսօր։

 Շնորհավորում ենք Երեխաների պաշտպանության միջազգային օրվա առթիվ, մաղթում ենք նրանց առողջություն, անհոգ ու երջանիկ մանկություն, անսպառ հետաքրքրասիրություն, նոր բացահայտումներ և մեծ ձեռքբերումներ։